السلام عليكم ورحمة الله وبركاته
هادي أول تجربة ليا للبرياني باللحم وبغيتكم تشاركوني فيه والحمدلله طلع بنيين
بسم الله نبداو بالمقادير
750 غ أرز بسمتي / 750غ لحم مقطع طراف صغار/ 4 بصلات متوسطين ومشلظين/ 4 مطيشات متوسطين ومشلظين/ خلطة توابل البرياني شريتها عند محلات العرب/ ثومة مدقوقة / معلقة كبيرة سكنجبير/ 250 غ يوغورت مسوس / كاس صغير زيت
فحالة ممتوفراش خلطة البرياني وجديها بنفسك بهاد التوابل
التوابل : معلقه سكنجبير + ثوم محكوك + القرنفل حبوب + الخرقوم البلدي و ديال الباكيه + وراق سيدنا موسى+ التحميره + الابزار + التحميره الحاره + الزعفران شعره + كمون +حبة الهيل+الكروية اختيارية +
لبزار حبوب ايلا بغيتيه حار
نغسلو الروز ونسلقوه مع شوية الملح نصف سلقة يعني منخليوهش يطيب باش ميتعجنش لينا من بعد
نديرو فطنجرة زيت ونشحرو البصلة حتي يولي لونها ذهبي من بعد كنضيف اللحم وثومة ونحرك شوية
نضيف القدر الكافي من الما ونسد عليه حتى يطيب اللحم
فهاد الأثناء درت الروز يتصفى مزيان من الما
ملي يطيب اللحم ضفت اليوغورت مطيشة وتوابل البرياني وخليه يشرب شوية
ناخدو طنجرة نفرشو فيها طبقة من الروز ثم المررق ونفرشو فالطبقة الأخيرة بالرووز
ونغطيو على طنجرة بألومنيوم ونديروه فوق عافية مهيلة شي 20 دقيقة أو نصف ساعة حتى نشوفو الروز طاب وعند التقديم كنخلطوه ونقدموه بالصحة والراحة
وهاهو الطبق ديالنا واجد كيف جاكم؟
ليست هناك تعليقات:
إرسال تعليق